以色列出土一隻 古糞坑內埋藏千年雞蛋

以色列一向都有唔少文物出土，而近排就有一樣另類嘅「文物」出土，唔少口痕嘅網民仲喺度諗，到底呢件「文物」會係咩味道。

呢次出土嘅並唔係一個棺材又或者古書籍，而係一隻喺古糞坑入面埋藏咗足足成千年嘅雞蛋啊！據以色列文物局公佈消息，喺以色列亞夫內嘅一個考古遺址入面，就出土咗呢件咁另類嘅「文物」，而研究古代世界家禽嘅首席專家加爾（Lee Perry Gal）就表示其實以往都喺大衛城、凱撒利亞、阿波羅尼亞等地發現過啲古老嘅蛋殼碎片，但就由於雞蛋表面好脆弱，基本上從來都冇完整咁將雞蛋內部保留到落嚟。

換言之，呢次嘅發現嘅雞蛋就連外層嘅碎片相當完整，雖然蛋殼有些少破裂，但仲保留到部分蛋黃，研究人員就表示會將呢啲蛋黃提取出嚟，嘗試去做DNA測試，瞭解呢種古老物體嘅資訊。