長城經過歷朝歷代嘅修築，喺全國各地都有唔少遺址出土，之但係要喺沙漠地區搵到一個明代長城軍營城堡就真係唔係一件容易嘅事，而近日陝北就有類似嘅發現喎！

陝西省考古研究院日前就喺榆林市靖邊縣毛烏素沙漠範圍入面，搵到一個布局分明、遺跡基本完整嘅明代長城城堡，經過考古學者確認之後，呢個城堡應該就係明延綏地區「三十六營堡」之一。榆林古稱「上郡」，係明朝喺北方沿長城興建嘅九個軍事重鎮之一，而喺呢條880公里長嘅防線上，「三十六營堡」就共駐兵57000人。至於今次發現嘅清平堡遺址估計就係明成化年間所建，整體就呈一個長方形，建成後就多次受到攻擊，其後就多次進行過增高加磚，而喺清康熙時期平定噶爾丹之後廢棄。之所以呢個營堡可以保存得咁完整，相信係因為佢被廢棄之後好快就被毛烏素沙漠覆蓋掩埋有關。

講咁耐，到底呢個城堡有啲咩發現呢？基本而言，考古團隊就喺呢度搵到大批建築遺跡，例如就有兩個院落、院牆、房屋等等，同時又有三十幾尊保存完好彩繪泥塑造像，而喺一個叫做「顯應宮」嘅院落入面，甚至仲發現到一個刻有「保佑本堡人馬平安，胡虜遠遁」嘅香爐，真係相當罕見！

原圖嚟自網絡