「最後的晚餐」變 「最後的G7」？

由Leonardo Da Vinci所繪嘅大型文藝復興時期壁畫《最後的晚餐》相信都已經係世界各地廣為人知嘅一件作品，呢幅壁畫繪畫咗喺米蘭天主教恩寵聖母多明我會院嘅食堂牆壁之上，係講述耶穌喺畀羅馬士兵捉捕之前同十二門徒共進最後一餐時候嘅景象，而近日就有一幅二次創作嘅作品引起熱議。

阿史所講嘅正正就係一位內地畫師將最後的晚餐改編成「最後的G7」，當中有唔少寓意都引起廣大民眾熱烈討論。畫作中分別就以國旗同埋動物代表參加會議嘅國家，就好似最左邊就係代表德國嘅黑鷹，其次係代表澳洲嘅袋鼠，代表日本嘅柴犬，代表義大利嘅狼，正中間就係代表美國嘅白鷹，而喺美國旁邊就係代表英國嘅獅子、代表加拿大嘅河狸、代表法國嘅高盧雄雞，同場仲有代表印度嘅象。

成幅畫作嘅場景就係各國都準備對代表中國嘅「蛋糕」落手，之不過其實成個情形就係德法同美國都貌合神離、意大利就唔想咁做，而英國同埋加拿大就打算效忠美國，而日本就端茶送核廢水，每種動物都有住自己嘅慘況。而按網民總結，成幅畫作就係呢班動物都以為可以企圖瓜分中國，但其實呢個已經係佢哋嘅「The Last G7」，真係高手在民間！