第五批國家級非物質文化遺產 竟然有呢幾樣食品?

阿史一向都鍾意同史友們介紹我國嘅非物質文化遺產，事關呢啲傳承都代表住先民千年以前嘅智慧，而近排國務院就公佈咗第五批國家級非物質文化遺產代表性項目名錄，當中有幾樣流行嘅食品竟然入選咗呢個名錄當中，阿史今次就同大家介紹下啦！

喺呢批185項新嘅名錄入面，有幾樣大家估都估唔到嘅食品，分別就係「奇臭無比」嘅柳州螺螄粉、酸爽酸辣嘅桂林米粉同埋梧州龜苓膏。柳州螺螄粉阿史以往都有同大家介紹過，呢款以柳州獨有嘅米粉加上酸筍、木耳、花生、油炸腐竹加上螺螄湯水調合而成嘅食品近年嚟受到國內民眾熱捧，甚至仲輸出埋去海外，真係認真巴閉！

至於桂林米粉其實就同柳州螺螄粉有啲相似，都係以酸筍加上花生、酸豆角等等配料調合而成，喺桂林街頭巷尾到處都有米粉店，甚至仲傳播到東亞各地區，真係相當有代表性。而梧州龜苓膏亦都係資西一帶嘅傳統藥用食品，相傳就係清朝時太醫嚴綺文流傳出民間嘅宮廷秘方，今時今日喺各大超市同埋街鋪都有賣緊，唔知史友們又有冇試過呢幾款食品呢？