人海戰術建深圳水庫

上次介紹咗東江水供港嘅歷史時，提及東江水供港其中一個重要建設深圳水庫，今次就要介紹下呢個水庫。

深圳水庫位於深圳市羅湖區，係深圳市蓄水量最大嘅水庫，而呢個水庫嘅興建同廣東省供水俾香港有好大關係。响上世紀五十年代末，當時廣東省政府已經有意响寶安縣興建一個水庫，仲向嚟自港澳過百位知名人士聽取意見，最終水庫响1959年開始興建。不過，當時內地工程技術水平唔高，要起一個水庫其實有相當難度。咁點樣解決呢啲問題呢？就係以人海戰術解決。當時廣東省政府動用超過一萬人投入水庫興建，開山闢路。據當時參與工程嘅工程師憶述，機械不足之餘，仲要顧及過萬施工者日常生活問題。為咗盡快完工，省政府後嚟更額外調動二萬名民工參與工程，高峰時期有成四萬人起水庫。最終，深圳水庫主體工程响1960年完成。

响1961年，廣東省同香港簽訂咗供水協議，深圳水庫就成為供水俾香港嘅主要來源。後嚟經國務院批准，於1964年另建東深供水工程，將東江水連接至深圳水庫，亦成為東江水供港其中一個關鍵點。