「亂噏」點解一定跟「廿四」？

喺形容人地亂講嘢、講嘅說話唔真實，通常大家都會用亂噏廿四嚟形容。「亂噏」就好易理解，之但係點解一定要跟埋「廿四」呢個數字呢？阿史今次就同大家介紹下啦！

對於「亂噏廿四」呢個詞，其實都流傳住幾種唔同講法，有指「廿四」其實只係加強語氣所用，並冇實質嘅意思；但另一個講法就真係有啲根據。提起「廿四」，讀開歷史嘅史友都應該會聽過「廿四史」，咁其實「亂噏廿四」嘅「廿四」正正就係代表緊中國古代嘅二十四部正統史書，就好似《史記》、《漢書》、《後漢書》、《三國志》、《明史》、《清史稿》等等。

咁問題嚟喇「亂噏」同埋「廿四史」拍埋又係想表達咩呢？其實就係講明凡事都有根有據，唔能夠亂講，所以就引用埋正統史書嚟做呢個對比喇！