今年喺中國共產黨成立嘅100周年,除咗唔少昔日相關嘅遺址重新開放,仲有好多當年嘅文物都被重新整理同修復,近排其中一樣最為有趣嘅就係陳獨秀次子陳喬年履歷表喇!

中國歷史研究院喺5月嘅時候就舉行咗「中國歷史研究院徵集海外中共珍稀文獻展」,當時就展出咗陳喬年呢份履歷表,隨即就喺網上成為熱話。到底好地地一份履歷表點解會咁值得討論呢?原來當中唔少部分佢所填寫嘅資料都係相當有趣,就好似被問到有冇去過外過,陳喬年就填寫「路過德國」;被問到「家庭經濟地位」,佢就直言係「官僚兼地主」;而最有趣嘅係被問到父親陳獨秀同埋兄長陳延年,佢直頭就寫「父:獨秀;職業:過去曾充教授,現在專以革命為職業」;兄:延年;職業:革命」。呢種咁直接嘅寫法真係估佢唔到,難怪會被內地民眾熱傳。

陳喬年生於1902年9月安徽懷寧,佢爸爸係「新文化運動」領袖陳獨秀,佢以20歲之齡加入中國共產黨,並且喺1925年春,赴法國勤工儉學,及後喺北京區委擔任重要職務,協助李大釗領導北方革命運動。而喺1928年6月6日,陳喬年喺上海楓林橋畔被國民黨槍決,年僅26歲。佢喺行刑前留有遺言「讓我們的子孫後代享受前人披荊斬棘換來的幸福吧!」。

原圖嚟自網絡