今年係中國共產黨建黨嘅100周年,全國各地都有唔少同早年革命活動相關嘅遺址經過修復後向公眾重開,而喺北京亦都有一個重點嘅建築物開放,呢個就係北京黨史展覽館喇!

北京黨史展覽館喺18號就開館,正式嚟講就會喺七月一日全面向公眾開放。呢座展館位於朝陽區北辰東路與大屯北路交會處,建築設計上唔少地方都充滿象徵,例如展覽館東西兩面用到嘅28條圓柱,就係象徵28年浴血奮戰建立新中國;黨史展覽館整體呈一個「工」字,就係象徵中國工人階級先鋒隊;展館主題郵局甚至仲用到特殊郵編「100100」象徵建黨100周年,寓意中國共產黨可以向着「兩個一百年」奮鬥目標勇往直前,認真有諗頭!

咁可能有史友都會好奇,到底建築內部會有咩睇呢?展覽就係以「不忘初心、牢記使命」為主題,分別就有四個部分包括:「建立中國共產黨 奪取新民主主義革命偉大勝利」「成立中華人民共和國 進行社會主義革命和建設」「實行改革開放 開創和發展中國特色社會主義」「推進中國特色社會主義進入新時代 全面建成小康社會 開啟全面建設社會主義現代化國家新徵程」。當中就有長城主題漆畫、一大會址復原場景、開國大典影像、抗美援朝戰爭入面用過嘅武器,而最巴閉嘅就係,會場入面竟然有埋馬克思《布魯塞爾筆記》第四筆記本手稿,認真犀利!

原圖嚟自網絡