繼續同史友們介紹一啲香港嘅古蹟，行過上環德輔道一帶，相信大家都會見過一座南面外牆係紅色嘅建築物，呢座建築物今時今日就係一座叫做「西港城」嘅商場，唔知史友們又知唔知道佢前身到底係咩建築呢？

位於上環德輔道中323號嘅西港城，前身其實係建於1906年嘅上環街市北座大樓同埋海事處舊址北座大樓嘅擴充部分。喺早年因為地方狹窄，海事處又要處理大量船政管理事務，所以就搬到中環嘅新填海地，至於呢座舊建築物拆卸之後，就喺1906年改建成以愛德華時代建築風格設計嘅上環街市北座。

由舊相睇嚟，呢座建築當年盲係以紅磚砌成，花崗石作地基，而且喺底層入口仲有一個巨型圓拱，真係相當優雅。而大樓最初其實唔係直接用嚟做街市，佢曾經都仲係海事處總部，只係後來先至改建成街市。而去到1983年街市嘅南座就因為地鐵港島綫第2期建築工程而拆卸，原址就改建成上環市政大廈，唔少商戶都搬晒入面，結果就令到北座由1989年起空置，修葺後加建2層變成4層，隨之搬入嘅就係食肆、布匹專賣店等等。

而去到1990年代，大樓就被古物古蹟辦事處列為香港法定古蹟進行全面修葺，後來更加多花布街商戶遷入西港城2樓，呢度就成為咗傳統行業及工藝品中心，未來到底會有咩發展，真係要拭目以待！

原圖嚟自網絡