形容人細個嘅時候好聰明、大個嘅時候成就一般，大家經常都會用到「小時了了，大未必佳」呢句說話，而呢句說話其實係同一位著名嘅歷史人物有關，佢就係「孔融讓梨」故事入面嘅主角，孔融喇！

據《世說新語》記載，孔融係東漢末年文學家，佢年幼非常聰明，喺佢10歲嘅時候佢就跟隨佢父親去到洛陽。喺洛陽當地就有一個士大夫李膺相當出名，但佢嘅性格就比較奇怪，如果唔係名士又或者朋友搵佢，佢基本上就唔會接見。

當時孔融雖然年紀輕輕，但其實就好想見一見呢位名士，於是佢就同守門嘅人講佢係李膺朋友，而當李膺見到孔融之後就誤以為雙方係有親戚關係，甚至仲出口問到孔融到底係邊位親戚。當時孔融就靈機一觸，回應話自己嘅先祖孔子曾經向李膺祖先老子請教，所以雙方就有師友嘅交情，而佢哋順理成章就係世交喇！

當時在場嘅人聽到孔融呢個回應都大讚佢聰慧，但就有一個賓客陳韙對佢講出「小時了了 大未必佳」呢句說話，而孔融亦都好快回話「想君小時，必當了了」，即時就令呢位賓客啞口無言。

原圖嚟自網絡