提起古代嘅巨型生物,恐龍化石就同大家講過唔少,之但係如果阿史同大家提起巨犀,史友們又知唔知係咩嚟呢?

據內地媒體報導,早前中國科學院古脊椎動物與古人類研究所鄧濤研究員就領導咗中美合作團隊依據一具長度超過1米、並帶有下頜骨同埋環椎嘅完整頭骨進行研究,最終就得出結論發現巨犀嘅一個新品種「臨夏巨犀」(Paraceratherium linxiaense)。

巨犀曾經係地球上生存過最大嘅陸地哺乳動物,體重可達24噸,而佢嘅腳係相當之長,站立嘅時候足足有五米高,主要就喺亞洲地區生活。呢個新品種據指就係喺青藏高原東北緣甘肅臨夏盆地漸新世晚期2650萬年前嘅地層發現,由呢個頭骨附近嘅伴生生物群顯示,當時中國西北地區實際上就係廣泛開闊嘅疏林地帶。

今次發現嘅巨犀比巨犀屬其他種更進步,體型更大而且仲有一個比較發達嘅軟鼻、強大嘅頭骨,至於點解會喺甘肅臨夏盆地出現?專家就估計巨犀就係喺蒙古高原到南亞,經中國西北地區擴散到南亞,而佢哋嘅後代亦都喺漸新世晚期返回甘肅、新疆,呢次發現亦都證明青藏地區喺漸新世晚期仲未上升成今日嘅高原。

原圖嚟自網絡