東江縱隊曾經發動海上游擊戰？

東江縱隊喺陸地上發動游擊戰打擊日軍嘅故事相信史友們都聽唔少，但如果講到海上都有游擊戰，唔知史友們又聽過未呢？

早喺日軍攻佔香港前，當時東江縱隊司令員曾生就已經諗到要組織海上嘅交通，並且派出九龍城劉培組織護航隊，亦即係後來東江縱隊護航大隊嘅前身，專門負責大鵬灣、大亞灣海域；至於港九大隊亦都由新界民眾自發組成咗「海上隊」，喺香港周邊海域作戰，兩支隊伍喺歷史上曾經合作多次出奇制勝。

喺1943年11月，當時港九大隊嘅海上隊就喺香港果洲外海巡邏，結果就發現喺汕頭方向有一艘日海軍機帆船同埋武裝木帆船向香港航行，結果呢支海上隊就即時作戰，令到日機帆船拋棄武裝木帆船逃走，而武裝木帆船嘅全數物資都被港九大隊充公；又例如去到1944年8月，當時海上中隊就派出兩艘武裝船隻去夜襲大鵬灣，結果就喺黎明之前擊沉日船3艘，斃傷敵38人，戰績相當唔錯。