加拿大第3間原住民寄宿學校遺址 無名塚發現182具遺骸

早幾日阿史就同大家講到加拿大又再喺原住民寄宿學校遺址搵到200個無名塚，點不知話口未完喺卑詩省內陸地區克蘭布魯克嘅下庫特尼原住民部族又再次有發現！

今次原住民部落就喺寄宿學校遺址附近發現182具遺骸，係自5月底開始搵到嘅第三個無名塚區，當中最細嘅遺骸亦都只係年僅三歲。下庫特尼原住民部族指出，佢哋利用雷達技術喺當地一間「聖尤金天主教寄宿學校」（St Eugene's Mission）遺址發現共182個無名塚，並喺大約1米深地下內發現遺骸。佢哋相信呢啲遺骸正係克圖納克薩（Ktunaxa）族人同埋庫特尼及鄰近「第一民族」等。

涉事嘅學校喺1912年至1970年間營運，係由加國資助嘅一百三十幾間學校之一，當中就有過千原住民學童曾經就讀。下庫特尼原住民部族就形容呢件事對原住民嚟講就係大屠殺，神父同埋修女必須為呢件事負上責任。