楊家祠係秘密大營救中轉站？

早排阿史都同大家介紹唔少香港嘅紅色史蹟，而提到喺抗戰時期共產黨人喺香港進行過最經典嘅一次行動，都莫過於係秘密大營救喇！唔講唔知大家又知唔知，其實香港都仍然有一個地方係同呢次事件有關，呢個地方就係位於元朗十八鄉楊家村嘅適廬（楊家祠）喇！

呢座建築物建於1936年，係由原藉梅縣嘅兩個印尼華商楊衛南及楊竹南所擁有，咁呢座建築又係點樣同秘密大營救扯上關係呢？喺1941年香港淪陷之後，當時日軍就大肆搜捕抗日人士，特別係一啲文化人，希望可以令佢哋幫手宣傳「大東亞共榮圈」。得知呢個消息，中共中央書記處同埋南方局書記周恩來多次指示營救抗日文化人，於是中共地下組織同埋數支武工隊就展開呢次行動。

秘密大營救由香港淪陷初期展開，先後救出文化人士、知識青年同埋佢哋家屬，而由於楊家村背後山路係同荃灣相連，可以直通去到醉酒灣防線城門碉堡，所以呢個地方就成為咗秘密大營救中轉站，經過東江遊擊隊營救嘅文化人就係沿住呢條元朗交通線通過日軍封鎖線，最終安全到達寶安抗日遊擊區據點，作家茅盾稱呢場營救係「抗戰以來最偉大的搶救工作」。