「兩航起義」奠定中國民航業發展？

提到建國初年嘅民航業發展，有一件事其實相當具有標誌性並且改變咗當時中國民航業嘅前景，呢件事就係史稱「兩航起義」嘅事件。

喺1949年，國共內戰戰況明朗，當時國民黨節節敗退而同年中華人民共和國亦都宣告成立，當時唔少海內外嘅國人對於前路都仲係好迷茫。其實早喺1948年，當時隨著內戰局勢不利，國民黨就已經將唔少轄下機關撤往台灣，中國航空公司（中航）、中央航空運輸公司（央航）仲有幾十架嘅飛機已經由上海轉移到香港。

之不過，去到1949年11月9日，兩航嘅飛機並冇如國民黨所願去到台灣，而係喺中航總經理劉敬宜同埋央航總經理陳卓林帶領下，由飛行員集體由香港駕駛12架飛機飛到北京同埋天津，呢次行程就被稱為「兩航起義」。「兩航起義」係一件極具標誌性嘅事，唔單止為後來新中國民航奠定重要嘅航空器材來源，仲影響埋當時舉棋不定嘅其他機構，及後仲有招商局、中國銀行等27個機構相繼宣佈起義，所以呢件事真係意義重大。