匈牙利出土數千枚中世紀硬幣 到時當時可以買到乜？

喺遺址、墓穴搵到古錢幣就唔係咩新奇事，但近日匈牙利出土嘅幾千枚中世紀硬幣嘅發現過程就真係有段故，而呢批硬幣仲被形容為相當珍貴，到底當時嘅價值又係點樣？阿史今次就同大家介紹下啦！

近排就有考古團隊喺匈牙利中部一個村莊嘅田地進行金屬探測，點知就喺田地當中意外搵到四個金幣同埋至少七千個銀幣，而奇怪嘅係，呢啲銀幣全部都放咗喺一個破碎咗嘅容器入面。據考古學家推斷，呢個容器之所以會爛咗，應該係農夫犁地果陣造成，但佢當時冇發現到，就咁錯失咗呢個寶藏。

成個考古發掘就由費倫齊博物館中心（Ferenczy Museum Center）聯同博物館常駐錢幣收藏家、硬幣專家一齊以兩日時間進行，咁大量錢幣到底當時可以買到咩呢？據估計就係可以一次過買到七隻馬喇！呢批錢幣當中最老嘅一個係直頭刻有公元二世紀羅馬皇帝路奇烏斯‧維魯斯（Lucius Verus）肖像，而最近一個就係1516年至1527年期間統治匈牙利國王路易二世，至於點解會喺田地出現？估計就係逃避1521年蘇萊曼大帝強行入侵匈牙利而放咗喺田地入面。