北京靈光寺供奉住佛牙舍利？

早排阿史就同大家介紹過內地考古學界發現到一副純金棺材，上面刻滿花紋同埋佛家圖案，但由於技術保存問題考古團隊遲遲都唔敢打開，但學者就推測當中應該會係舍利。而提起呢類珍貴嘅佛家重寶，阿史就諗起北京靈光寺，當中嘅「佛牙舍利」能夠保存到今日都真係充滿奇蹟！

靈光寺位於北京石景山區覺山，係一座漢傳佛教寺院，始建於唐朝大曆年間。喺遼道宗咸雍七年（1071年），當時嘅丞相耶律仁先之母鄭氏就出資喺寺內建造咗一座「招仙塔」，專門用嚟供奉「佛牙舍利」，多年嚟都相安無事。時間去到光緒二十六年（1900年），八國聯軍攻入北京，其中一支部隊就嚟到靈光寺圍剿義和團，過程中八國聯軍就以大炮朝靈光寺開炮，轟毀靈光寺同埋招仙塔，唔少靈光寺財物都被搶奪。

而喺戰火過後，靈光寺僧眾就返到呢個地方，並且喺廢墟入面搵到招仙塔塔頂露盤同埋石函，打開一睇就係北漢僧人釋善慧題寫嘅「釋迦佛靈牙舍利」七個字以及佛牙一顆，呢個驚人嘅發現就係咁樣發生。而喺靈光寺重建之後，僧眾就將佛牙供奉喺寺內。唔講唔知，呢粒佛牙後來都同香港有啲關連，阿史下篇再同大家介紹下啦！