上次提及過光緒帝有一后兩妃，兩妃就係珍妃同瑾妃，今次阿史就想介紹下佢嘅皇后隆裕皇后。

對於隆裕皇后嘅身世，普遍認為佢係慈禧太后之弟都統桂祥嘅女兒，簡單而言同光緒係表兄妹。當然！佢之所以成為皇后都係因為慈禧嘅安排，用嚟監視光緒，加上佢本身又無乜姿色，所以光緒在生時對佢都無乜好感。

响光緒帝死咗之後，佢就被尊為隆裕皇太后。而佢個陣佢可以話最風光之時，因為當時溥儀登基為通帝時年僅三歲，所以就由隆裕太后撫養。至於朝中討論政事佢仲有權參與，算係清廷其中一個話事人。不過，呢位話事人就一啲都唔好當。1911年辛亥革命爆發後，清政府同南方國民政府講數，最後得出清帝遜位可保住清皇室嘅條件，最後隆裕太后响1912年2月12日上朝時正式頒布《遜位詔書》，二百幾年國祚嘅滿清皇朝就咁終結。

隆裕太后決定清帝遜位之後，覺得對唔住列袓列宗，終日鬱鬱寡歡，過咗一年後仲死埋。只可以話，呢位皇后/太后都幾命苦。