毛澤東生前接受美國作家斯諾訪問時講過，話一生中最黑暗嘅一段路程，就係長征路上同張國燾嘅鬥爭。咁張國燾又响長征個陣做咗啲乜嘢呢？

相信史友們對張國燾一啲都唔陌生，佢本身係北大學生嘅佢，曾經係五四運動學生領袖之一。後嚟投身革命事業，係中國共產黨成立初期一位骨幹成員。1931年，中國工農紅軍第四方面軍（簡稱紅四方面軍）成立，張國燾成為實際話事人，亦成為紅軍中一位軍事實力派代表。後嚟佢放棄鄂豫皖蘇區退到陝西、四川一帶，成功建立川陝根據地，成為中央紅軍外一大軍事力量。

長征時期，紅四方面軍响1935年放棄川陝根據地，同中央紅軍响四川懋功地區會師。當時紅四方面軍擁有近八萬人，兵力上比中央紅軍嘅紅一方面軍多好多。亦因為咁，張國燾就同毛澤東針鋒相對，特別係紅軍未來要「北上」定係「南下」出現分歧。張國燾主張南下四川，而毛澤東、周恩來等人主張北上。後嚟張國燾更另立「中國共產黨中央委員會」宣佈開除毛澤東、周恩來、博古等黨籍，所以有長征有一段時期係出現咗兩個「中央」。

咁件事係點樣平息呢？一方面中共中央政治局响陝北成功建立咗陝甘寧根據地，另一方面張國燾因南下受挫，八萬兵力減到得返三萬，因而被共產國際命令取消「（第二）中央」，最後張國燾响1936年宣佈取消「（第二）中央」，並準備成立中央西北局，中共中央亦同意批准。

根據賀自珍嘅憶述，後嚟張國燾去到延安，最初鬧到自己一文不值，但後嚟又唔認賬。

原圖嚟自網絡