以往阿史都同史友們介紹唔少我國有特色嘅博物館,而近日內地又有一間相當有規模、有睇頭嘅展館開幕,就係號稱係全球建築規模最大嘅天文館,上海天文館喇!

上海天文館足足係經歷咗1700幾日嘅建設先至向公眾開放,呢間佔地5.86萬平方米嘅建築物主體係以螺旋形態構成「天體運行軌道」,設有一個圓洞天窗、球幕影院同埋倒轉穹頂,單係呢三項元素就已經好有睇頭。而喺建築內部,天文館係採用不規則形狀鋼結構,過程中就有好多空間結構技術難題需要解決,最後先至可以成功設置到一個內徑23米球幕影院。

雖然話就話係天文館,但其實都有唔少文物可以睇架。今次上海天文館就徵集咗超過120件天文文物展出,其中就有牛頓《自然哲學的數學原理》英文版第一版(1729年)同埋伽利略嘅原版著作,絕對係天文發燒友想去嘅地方!

原圖嚟自網絡