尋日阿史就同史友們介紹到內地有位石頭發燒友，九年嚟為咗重製「滿漢全席」不惜傾盡家財，仲搞到老婆都同佢離埋婚。石頭版嘅「滿漢全席」就咁貴，咁如果後人真係重製呢個巨型宴席，又需要用到幾錢呢？

喺1977年嘅11月，其實香港就有一間國賓酒樓受到日本TBS電視台委託，當年就用到十萬蚊呢個價錢去重製有108道菜嘅滿漢全席。據了解，當年為咗可以完成呢件事，酒樓一共動用咗160幾日用3個月籌備，成個過程甚至仲直播到日本嘅電視台，認真誇張。

十萬蚊今時今日睇嚟好似唔係好多，但喺當年其實就差唔多買到一個400呎嘅單位。當年呢十萬蚊，其實食材費用就只係佔2萬，其餘八萬都係用喺場地佈置之上。十五磅重嘅老熊掌、崑崙網鮑、鱘龍魚腸等等嘅食材，淨係聽個名都知今時今日已經冇可能再現，更加唔洗講啲炮製菜式嘅手藝有冇失傳。而當年日本攝製隊其實係請咗十個人嘗試呢個宴席，除咗有七個人日本人之外，其他都係香港人，其中一位就係阿姐汪明荃喇！

原圖嚟自網絡