之前阿史介紹完北齊呢個短命朝代，國祚28年經歷六任帝王，個個都冷酷殘暴、荒淫無道，結果成個皇朝仲被封為「禽獸王朝」。講到北齊，除咗啲皇帝離譜，令一個為後世人所熟悉嘅就係幾位名將。

講到北齊名將，相信史友們第一個諗起應該係蘭陵王高長恭。呢位老豆係北魏大丞相高澄嘅蘭陵郡王，响邙山之戰大破北周大軍。由於佢才武而面美，常著假面以對敵，令後世人對呢位名將有好多幻想。可惜，由於佢功高蓋主，即使自毁名聲，但最後換嚟北齊後主高緯賜下毒藥，遂飲藥薨。

北齊另一名將就係大將軍斛律光。呢位武藝高超嘅名將好早就深得北齊高祖神武帝高歡賞識。後嚟佢多次擊敗北周大軍進犯，好似响汾水之北大破北周步騎。由於戰績甚佳，因而獲拜為左丞相。可惜，佢又係名氣太大，結果北周派人响北齊散佈謠言，指「高山不推自崩，槲樹不扶自豎」，暗示斛律光會取高氏皇朝而代之，最後斛律光被北齊後主高緯派人暗殺，盡滅其族。

除咗高長恭同斛律光，北齊仲有位名將叫段韶。佢本身係北齊開國功臣，擊討南梁，數敗北周，响邙山之戰中佢以誘敵之計，大敗北周軍隊，同高長恭一樣立下大功。不過，佢最後一次回師途中病重去世。

北齊三大名將兩位枉死，最後一位如果唔係病死，都唔知會唔會俾皇帝殺埋。

原圖：電視劇《蘭陵王》劇照