圓洲角短樁居屋案

嘩嘩嘩！响大圍起緊嘅一個豪宅樓盤，被發現有兩座牆身底座部分混凝土強度未達設計要求，發展商就決定將已建樓層全數拆卸重建，仲會有額外津貼同利息補償俾繼續完成買賣合約嘅準業主添。不過隔離幾座嘅業主，依家都唔知瞓唔瞓得著。

呢單嘢就令阿史諗起廿幾年前又係响沙田區發生嘅短樁居屋案。响1999年，沙田圓洲角愉翠苑兩幢居屋出現不尋常沉降情況，經檢查後發現兩座樓宇近九成嘅樁柱唔符合規格。房委會基於安全理由，將兩座「短樁」樓宇拆卸。

廉署調查發現，事件承建商怕趕唔上工期，於是行賄項目工程監督以掩飾「短樁」問題。最後，承建商兩名董事以及地盤代表被控串謀詐騙房委會，且罪名成立。