陝西省臨潼縣 發現秦代兵馬俑

被聯合國教科文組織列入《世界遺產名錄》、被稱為世界八大奇蹟之一嘅秦代兵馬俑原本只係深埋地底之下，而喺當年今日就因為一件事而令到呢個珍貴遺址重見天日。

1975年7月10日，陝西省臨潼縣就有生產隊長楊培彥、副隊長楊文學為咗預防旱災而打井，當時佢地喺驪山峪口環顧地形之後，就確定打井位置。喺6個青壯年努力之下，打井嘅工程就展開，點知兩日之後當個井挖到3米左右，就遇到一層好深嘅紅土，當時佢哋就已經猜測可能係一個磚瓦窯。而呢個井繼續挖到4米嘅時候，秦始皇陵兵馬俑軍陣就有第一塊陶片、第一個陶製人頭出土，當時佢哋仲以為係咩不祥之物。

呢個消息一傳出之後，附近村落嘅人都前來圍觀，當時村民都未知呢啲遺物係「秦始皇陵兵馬俑」，但就有人估計可能係國寶。冇幾耐，就有考古工作者嚟到呢個地方進行探測，斷定呢啲正係秦代工藝所製，結果就確認有一個總面積12,600平方米嘅兵馬俑坑，就以一號兵馬俑坑命名，呢個消息甚至仲傳到去國務院果度。