河南夫妻清朝光緒年間出生 被封為「世界年齡最大夫妻」

一段婚姻要維持幾年已經唔容易，假如世上有對夫妻對足大家八十六年，唔知史友們又想唔想像到係點呢？

近排河南省商丘市寧陵縣嘅一夫妻就被封為「世界上年齡最大的夫妻」，佢哋分別係119歲嘅彭思成同埋114歲嘅劉秀榮，加起上嚟呢對夫婦就有成233歲，真係難以想像。

呢次呢個世界紀錄係得到自英國嘅「扛旗世界紀錄」（Carrying the Flag World Records）認同委託頒發，據佢哋個仔彭萬勝描述，父親彭思成於1902年（光緒28年），而母親就係喺1907年（光緒33年）8月出生，兩人86年嘅婚姻之中就一共生咗七個仔女，最大果個女都已經有85歲，成家就已經六代同堂有成百人架喇！被問到點解佢哋可以咁長壽、婚姻可以維持到咁耐，佢哋就表示最緊要係憶苦思甜，盡享天倫之樂，喺生活當中多啲關心對方。