奧斯威辛集中營 96歲倖存者離世

被稱為奧斯威辛集中營最後倖存者之一嘅貝哈拉諾（Esther Bejarano）喺上星期六嘅德國漢堡一間醫院離世，享年96歲。

喺兩戰時期，納粹德國曾經就喺波蘭設立過奧斯威辛集中營，喺呢個集中營當中納粹德國就實行萬湖會議通過嘅「最終解決方案」，通過滅絕營實行有系統嘅猶太人大屠殺行動，據估計至少有110萬人喺呢度被殺。貝哈拉諾喺18歲嘅時候就被送到呢個集中營，當時佢嘅父母同埋姐妹就已經被納粹德軍殺害，而佢去到呢個集中營初時就只係負責搬運石塊等勞動工作，後來因為佢識得演奏手風琴，於是就主動請纓，成為40個女囚犯組成嘅女子管弦樂團之一。

喺獲救之後嘅好多年，佢就接受過傳媒訪問，佢表示當時每有新一批猶太人入營又或者有囚犯出發做野，管弦樂團就要演奏，而事實就係呢班人當時係被送入毒氣室。貝哈拉諾之所以倖存，係因為佢喺被送到另一個女子集中營期間成功逃脫，後來佢就同其他倖存者創立國際奧斯威辛委員會，不斷分享呢段歷史。