「潘趣酒」竟然係咁樣嚟？

今時今日喺各大嘅派對入面，大家都必定會見到一種用一大個透明玻璃碗裝住嘅飲品，呢種類似果汁嘅飲品名為Punch。唔知史友們又知唔知，呢種咁奇特嘅飲品，起源竟然係同貿易商船有關？

所謂嘅潘趣酒（Punch）其實係嚟自印度拜火教徒嘅外來語，本來係叫做「panj」，意思就即係解做五，到底點解同呢個數字有關呢？原來喺17世紀嘅時候，唔少商船都會喺歐洲來往中國運送瓷器，而當時就有一艘東印度公司商船喺大洋之上航行，而船員嘅生活亦都相當苦悶，只好飲酒解悶。當時就有一個船員搵到一個臉盆咁大嘅瓷碗，先將塔菲亞酒（由甘蔗汁製成廉價朗姆酒）倒入去，之後就加入糖、果汁、肉桂、茶葉，五種材料就構成「潘趣酒」，亦都係印度語入面嘅「panch」，就係咁樣構成呢種酒第一種版本。

而後來呢種調酒方法就傳到去英國，就連調酒用嘅瓷碗都係用返中國瓷碗，呢種用長勺你一杯我一杯嘅飲法甚至仲成為當時嘅潮流，慢慢改良流傳到今日。