喺唔少古裝劇集入面，提起大戶人家嘅女子通常都會稱之為「千金」，但唔講真係唔知，呢個詞原本其實係指男子架！ 

「千金」呢個詞最早就係出現於《南史》記載，當時著名文學家謝莊個仔謝朏自幼就好聰明，十歲左右就已經可以出口成文。有一日謝莊就帶埋個仔陪同皇帝出遊姑蘇，而喺出遊過程出皇帝就聽聞謝朏好有才華，所以就想佢當場寫一篇《洞井贊》。

結果，謝朏揮筆成文，仲要係「文不加點，援筆即成」。當時皇帝就大為驚訝，仲以神童稱呼佢，而宰相王景文亦都表示「賢子足稱神童，復為後來特達。」聽到咁多人讚自己個仔，謝莊都開心到話「真吾家千金！」就係咁，「千金」呢個詞後世就用嚟形容出類拔萃、德才兼備男子。

至於點解後來呢個詞會變成形容女子呢？喺元雜劇《薛仁貴榮歸故里》入面就有一句台詞「小姐也，我則是個庶民百姓之女，你乃是官宦人家的千金小姐，請自穩便。」「千金小姐」呢個詞就係喺呢度而生，亦都因為戲曲嘅廣傳而更成知名，甚至明、清以後嘅話本都以「千金」形容大戶人家嘅女孩，真係估佢唔到。

原圖嚟自網絡