末代太監苦求進宮 閹完之後清朝滅亡?

喺悠久嘅中國王朝史入面，皇帝身邊一直都存在一個重要嘅角色，呢個角色既可以好好服侍皇帝，喺某啲朝代亦都可以令到皇朝覆亡，呢個角色就係太監喇！提起太監，除咗有大家都一定聽過嘅李蓮英之外，其實仲有一個太監都相當出名，佢就係孫耀庭。

孫耀庭出生喺1902年嘅天津，家中有四兄弟，年幼時家境貧困，但佢有幸都喺讀過一排書，但後來家境愈嚟愈差，父母亦都淪為乞丐，當時佢哋就已經打算將孫耀庭送入宮做太監。之不過，當時正值武昌起義，清朝冇幾耐亦都被消滅，孫耀庭父母呢個計劃最終都唔成事，而民國當時亦都有禁令，禁止民間徵召太監。

之不過，當時末代皇帝溥儀唔理呢個禁令，繼續喺民間徵召太監，孫耀庭父母就將孫耀庭淨身，送入原清朝醇親王府工作，後來轉去紫禁城伺候婉容皇后。後來嘅故事相信大家都好清楚，溥儀被軍閥馮玉祥趕出紫禁城，孫耀庭返到老家，直到偽滿成立之後佢先至到長春服侍溥儀。