中非發現500 年前屍骨 死者生前進行另類「整容」？

繼續同史友們介紹近排世界各地嘅一啲考古發現，無論係喺古代定係現化，「貪靚」都係人之常情，之但係如果為咗靚而咁樣傷害自己身體，唔知史友們又點睇呢？

近排喺Antiquity 嘅考古研究就公布咗一項發現，當中就係關於喺1992年發現嘅中非國家加蓬恩古涅省 (Ngounié)嘅Iroungou 洞穴，近年展開發掘喺入面搵到至少24具成人、4個兒童合共幾千塊骨頭，連同陪葬嘅仲有幾百件金屬製品、珠寶、武器等等，由呢啲陪葬品睇嚟，呢啲骸骨嘅主人生前都有返咁上下地位。

據考古團隊估計，呢次發現嘅骸骨應該就係屬於500年前非洲中部嘅人，團隊喺發掘過程入面並冇將骸骨帶離洞穴，反而係以3D 方式同埋激光掃描重塑洞穴結構，結果喺大部分骸骨入面就發現一個共通點：所有完整嘅上顎都缺少最前面四顆門牙，而且全部都有癒合跡象，咁就反映佢哋都係死前被拔牙而且有足夠時間癒合。