浙江井頭山遺址 發現中國最早漆器

今時今日唔少木製嘅傢俬上都會用上一層漆去保護表面，睇落好似好簡單嘅舉動，但喺古時要做到就真係唔容易。近日喺浙江餘姚井頭山遺址（公元前6300－前5800年）考古人員就有新嘅發現，呢個發現將中國用漆嘅歷史足足提前到8,000年前。

浙江餘姚井頭山遺址其實早喺2013年就已經發現，當時就已經號稱係長三角地區第一個、亦都係目前發現最早、埋藏得最深嘅貝丘遺址。雖然呢個遺址係屬於新石器時期，但佢所屬嘅年代比附近嘅河姆渡遺址仲早咗成千年。唔單止年份久遠，原來遺址當中出土嘅器物都好有睇頭。考古人員就喺遺址入面搵到帶有人工塗層痕跡嘅銷釘殘木器同埋扁圓體木棍，經過化驗之後竟然係漆嚟嘅！

目前為止我國關於史前漆器嘅研究好大程度都係依賴河姆渡遺址漆器碗，而呢次嘅發現就可能令到考古人員知道漆器喺古代應該仲有一個好漫長嘅發展過程。