之前介紹過响抗戰期間蔣介石同史迪威互相睇唔順眼,當時甚至有唔少江湖傳聞,其中一個就係話史迪威想暗殺蔣介石。

關於史迪威想暗殺蔣介石,係响上世紀七十年代由台灣學者梁敬錞所著《史迪威事件》當中提及。咁呢個「買起蔣介石」傳說係點嘅呢?綜合多個版本,大概係蔣介石原定响1944年3月應邀出訪印度,視察中國駐印軍隊,美軍就趁機响飛機做手腳,等飛機經過喜馬拉雅山上空嚟個機毁人亡之類。不過因為中國响1944年3月戰事失利,蔣介石取消前往印度計劃,呢個行動胎死腹中。

對於呢個暗殺傳聞,史迪威外孫就曾經否認過,話自己阿公係正直軍人,又唔係政客,無可能做出刺殺呢種事。不過佢都唔排除當時可能上頭「講過下」,史迪威就認真諗過。嘩!咁即係真係有人諗過?