海上絲綢之路大家都應該聽唔少，到底茫茫大海當中呢啲船隻係點樣航行，又點樣促進文化傳播呢？近日城大就有個新展覽畀到啲啟示大家。

城市大學般哥展覽館由即日至2021年10月3日舉行《海上佛教地圖集》展覽，當中就以考古、藝術、歷史研究、數位媒體等等嘅方式，為大家提供一個新視角。呢次展覽就搵嚟香港城市大學楊建文講座教授（媒體藝術）及互動媒體與電算應用中心總監邵志飛教授、瑞士洛桑聯邦理工學院數碼博物館學教授莎拉‧肯德丁教授、台灣高雄佛光山佛陀紀念館館長如常法師和般哥展覽館總監范懿莎博士等資深學者。

呢次展覽塑造出一場虛擬旅程，等參加者可以了解到海上絲路港口連接同埋擴散，於是360度虛擬實境旅程就相當重要喇，事關觀眾可以通過手動形式操作投影機，一次過體驗斯里蘭卡、緬甸、柬埔寨、泰國、爪哇、印度同埋中國嘅標誌佛教建築及遺跡，感受海路上佛教文化流傳，而且場內仲有iDome半球形投影佛教石窟，搵日真係要去睇下先得！

原圖嚟自網絡