華東水災觸動港人心 賑災籌款成熱潮

今日網絡上廣泛流傳一宗令人擔憂嘅消息，就係河南多地都受到暴雨侵襲，降雨「突破歷史極值」，目前為止全省已經有89個縣（市、區）560個鄉鎮1,240,737人受災，災情相當嚴重。眼見呢個情況，有唔少香港演藝人同埋市民都主動提出捐款救助，香港人嘅呢片熱心就令阿史諗起華東水災果陣。

喺1991年5、6月間，內地就有18個省市、自治區、直轄市發生水災，而當中災害最嚴重嘅就係安徽省、江蘇省。安徽省受災人口達4800多萬人、江蘇省受災人口達4200多萬人，而最令人震撼嘅係，當時無家可歸嘅災民甚至要喺淮河大堤上搭起臨時帳棚。

當時內地同胞嘅慘況觸動咗唔少港人嘅心，演藝界主動發起「演藝界總動員忘我大匯演」為災民籌集善款，沈殿霞、黃霑、梅艷芳、周潤發等都有參與、演藝界仲拍攝電影《豪門夜宴》籌集善款，總之就真係有錢出錢、有力出力。唔單止咁，當時社會上仲掀起捐贈救助華東水災熱潮，男女老幼都齊齊去到募捐處捐款，真係萬眾一心。亦都因為咁，香港當年喺短短十日時間就已經籌到4.7億多港元，最後仲成功捐款6億，相信唔少史友都仲記得好清楚。