受到新冠肺炎影響,延期接近一年嘅東京奧運即將舉行,對大部分運動員嚟講,呢場盛事都係佢哋生涯當中最值得重視嘅,甚至對部分運動員嚟講呢場更加係佢哋嘅「告別戰」。喺呢個重要嘅時刻嚟臨之前,阿史就想同大家介紹幾位重要嘅運動員,今次就講一講乒乓選手馬龍。

聽到馬龍呢個名相信唔少史友都覺得好熟悉,事關佢真係一位響當當嘅人物。現年33歲嘅佢,早喺5歲嘅時候就已經學打乒乓波,13歲嘅時候就被教練帶到北京深造,喺2003年就進入國家一隊,自此就踏上佢嘅國際青年賽之路,獲得世界各地嘅青年錦標賽獎項。時間去到2005年,佢亦都告別青年賽,並且開始同孔令輝搭檔雙打,拎到唔少重要嘅獎牌。

馬龍嘅犀利唔單止係拎得多獎牌,佢更加係世界上第10位大滿貫選手(即係奧運會、世界乒乓球錦標賽、國際乒聯WTT四大滿貫賽事單打冠軍),並且仲係中國第一位集奧運會、世錦賽、世界杯、亞運會、亞錦賽、亞洲杯、巡迴賽總決賽、全運會單打冠軍於一身嘅超級全滿貫男子選手。

嚟到今年馬龍已經33歲,喺參加呢次奧運會之前,佢就表示自己狀態已經今非昔比,但仍然希望可以為國爭光!

原圖嚟自網絡