海底發現埃及亞特蘭提斯 埋藏軍艦遺骸與墓地

繼續同史友們介紹一啲世界近排發生嘅考古新聞，對於被稱為「埃及亞特蘭提斯」嘅古城Thônis-Heracleion，歷年嚟都有唔少考古團隊嘗試發掘研究，而近日就由歐洲海洋研究與發展研究所就喺埃及北部亞歷山大港（Alexandria）附近先係搵到一艘罕見嘅古代軍艦遺骸，繼而仲發現埋一個可以追溯到公元前4世紀嘅墓地遺址。

據考古團隊介紹，發現呢艘軍艦嘅位置正正就係著名古埃及阿蒙神廟旁邊，初步睇嚟呢艘平底船就有25米長、配有槳同埋大船帆，而且仲保留住古埃及嘅傳統建築風格，極具研究嘅價值。而喺呢座古城嘅另一邊，考古團隊仲發現到一個大型嘅墓地遺址，呢項重要嘅發現更加印證到曾經有希臘商人喺古城遺址入面定居，亦都證明希臘人喺古埃及晚期係被允許喺古城之內定居，同歷史記載相符。

至於點解呢啲重要嘅建築會喺海底呢？研究人員就推斷以往希臘人喺阿蒙神廟附近聚居，其後由於受地震與海嘯侵襲，墓地亦都隨神廟崩塌而一同沉入海底。