今日跳水夢之隊一出場就喺女子雙人3米彈板項目拎到金牌,實力真係不容忽視,可能有唔少史友都有個疑問,就係到底點解中國跳水隊會叫做「夢之隊」。

提起「夢之隊」呢個名,有返啲年紀嘅史友可能都會知道係同美國嘅男子籃球隊有關。隨住1989年國際籃聯更改制度之後,當時美國嘅職業球員就被允許參加國際籃球賽事,於是所有NBA嘅頂尖球員就組成咗一支1992年巴塞隆那奧運會嘅男子籃球隊,呢個陣容當年唔單止係拎到冠軍,更被世界各地嘅球迷稱為「夢一般」嘅隊伍,所以就出現咗「夢之隊」呢個詞。

「夢之隊」後來就被用嚟形容喺世界大賽當中有夢幻表現嘅隊伍,亦即係中國跳水隊。喺1984年洛杉磯奧運以嚟,跳水隊就已經為中國累計拎咗超過四十塊奧運金牌,甚至仲出現過伏明霞、田亮、郭晶晶呢啲傳奇人物,而喺2018年嘅雅加達亞運會當中,中國跳水隊甚至係第十二次拎晒所有金牌,實在真係嚇死人。時至今日,提起「夢之隊」,大家諗起嘅都唔係美國嘅男子籃球隊,而係中國嘅跳水隊!

原圖嚟自網絡