尋日港隊嘅體操代表石偉雄出戰奧運跳馬項目,其實早喺比賽之前佢就已經揚言會用「李世光跳」及「李世光跳2」兩個高難度動作應戰,喺比賽當中佢都順利可以完成到呢兩個動作,但就喺落地嘅時候有少少失手,最終都係無緣晉級。賽後佢就表示已經有心理準備接受所有風險,並且表示日後都會繼續用「李世光跳」應戰,到底「李世光跳」呢個動作有啲咩魔力,又係點解會被稱為係全球最難跳馬動作呢?

介紹呢個動作之前,就當然要講一講李世光。李世光係朝鮮體操名將,佢曾經喺2016年里約熱內盧奧運贏得男子跳馬金牌,喺佢生涯入面仲拎到3面世界錦標賽金牌,甚至仲因為佢有兩個超高難度嘅跳馬動作而直接有兩個動作係用佢個名命名。

喺2009年,李世光作為第一個喺世錦賽做出極高難度動作「笠松轉體270度後空翻兩周」之後,連同之後另一個「李世光2」嘅動作一同被獲國際體操聯會(FIG)評分最高難度分(6.0)單項動作,所以要以呢兩個動作應戰,真係難度十足!

原圖嚟自網絡