提起奧運,相信唔少史友都會即時諗起中國嘅跳水夢之隊、女子體操隊同埋乒乓球隊,但對阿史嚟講,第一時間諗起嘅就必定係女排。

喺尋日嘅女排比賽當中,首戰爆冷輸波輸咗畀土耳其,表現真係強差人意,但類似嘅開局喺上屆奧運入面都發生過,上屆奧運中國女排5場分組賽僅得2勝3負,小組賽亦都係以第四名晉級8強,但一樣可以拎到冠軍,所以球迷都未必需要太擔心。

講起呢隊女排嘅成長史,其實礙於亞洲人身型同埋力量排球以往未必係中國嘅強項,但自從踏入八十年代之後,中國女排就開始騰飛,而當中不可不提嘅就係1984年洛杉磯奧運會嘅比賽。

喺早年嘅世界排球嚟講,就以蘇聯、日本、美國等球隊為最強,喺1984年洛杉磯奧運會之前中國隊亦都曾經同日本、美國交過手,大家各有輸贏。踏入1984年,中國女排就參加咗美國舉行嘅洛杉磯奧運會,呢次比賽就相當驚險。中國隊喺分組賽就先被分成同美國隊同組,並且喺分組賽當中畀美國隊擊敗,但後來就越戰越勇,先後擊敗巴西、德國、日本等強國,跟至進入到決賽以直落三局輕取主辦國美國,報咗分組賽一敗之仇,並且首次獲得奧運金牌。

呢次奧運金牌亦都係繼1981年女排世界盃、1982年女排世錦賽冠軍之後,女子排球三連冠,標誌住中國正式成為女排強國。

原圖嚟自網絡