今屆東京奧運港隊代表張家朗拎到金牌之後，有記者疑似情不自禁咁响訪問中半表白式咁發問，結果網上出現成堆負皮。有網民見大台派個女記者咁嘅質素，慨嘆以前大台體育女記者韓毓霞非常專業，仲集氣求佢即時復出飛去東京採訪今屆奧運添！

韓毓霞可以話係家傳戶曉嘅體育女記者以及殿堂級體育主持，佢响八十年代加入大台，被調入體育組主持《體育世界》。大學主修英文嘅佢因為外語了得，所以就成為大台體育節目中採訪外國運動員嘅專用記者。自1992年巴塞羅拿奧運開始，連續七屆為大台親身採訪奧運運動員。最記得佢响2016年訪問百米飛人保特，保特仲送上一個熱情擁抱，成為一時佳話。不過，由於大台解散咗體育組，韓毓霞被投閒置散，最後同大台結束賓主關係，史友們响東奧亦睇唔到佢採訪嘅畫面。

原圖：tvb.com