喺東京奧運入面除咗可以欣賞到精彩嘅比賽之外，都有唔少另類嘅趣事發生，就好似尋日港隊代表杜凱琹、李皓晴及蘇慧音出戰女子乒乓球團體賽果陣，去到第四局嘅單打項目港隊教練李靜疑似因為太激動，忽然喺轉播期間爆咗句「X！你企喺中間啦！企中間佢發你長嘅，你咪反手拉佢囉！」而成為一時熱話。

有返咁上下年紀嘅史友可能都記得李靜呢個名，無錯喇，佢就係當年香港嘅「乒乓孖寶」之一。當年嘅「乒乓孖寶」就係由高禮澤同埋李靜所組成，高禮澤原本係國家隊成員，喺1993年全國青年錦標賽取得男單亞軍、1996年亦都係全國錦標賽男團冠軍隊員；至於李靜就係全國錦標賽取得男單亞軍，並且入選過國家一隊，但喺1997年佢就以體能為理由退出國家隊，而兩人就喺2000 年加入港隊發展。

高禮澤、李靜聯手之後，就喺2004年雅典奧運會為香港取得歷來第二面奧運會獎牌－男雙銀牌，「乒乓孖寶」呢個名亦都係咁樣而嚟！

原圖嚟自網絡