近排全城都因為東京奧運而牽起一股運動熱潮，甚至仲有唔少網民嘗試翻查我國早期運動員同埋奧運嘅歷史，近排阿史就見到一張好有意思嘅舊照，而呢張舊照當中嘅主角竟然係一位著名藝人嘅爸爸！

阿史所講嘅呢位人物之唔係譚詠麟嘅爸爸譚江柏囉！出生喺清朝宣統三年嘅早喺1930年代就已經係足球代表隊成員，同時佢都係香港球壇嘅名宿，先後效力過南華、星島、九巴等香港甲級足球聯賽球隊，認真威風。

本身喺香港發展嘅譚江柏到咗30年代就應南華隊友葉北華邀請返到廣州發展，加入埋廣州警察隊，同另外馮景祥、李天生四名南華球員被稱為「廣州四騎士」。唔講唔知，譚江柏身高5尺10吋，頭球技術當時被稱為全國第一，所以有「譚銅頭」呢個稱號！

而講到佢最威風嘅一件事，就係喺1936年去到德國首都柏林參加奧運足球賽，當時球王「李惠堂」都有一齊去，對手就係英國隊，上半場比數0-0，下半場以0-2不敵英國隊。據聞當時譚江柏仲獲希特拉頒授過一隻懷錶。而返到中國之後，譚江柏就因為惡意犯規被罰停賽，再加上抗日戰爭嘅緣故，球員生涯大受影響，最後喺1948年宣告結束球員生涯。

原圖嚟自網絡