如果史友們有留意到呢排奧運乒乓球嘅賽事，應該都經常會見到圖中嘅呢位男子，就連港隊女乒奪得銅牌之後，其中一位球手杜凱琹都專門發文多謝佢，而呢位其實並唔係普通人物，而係中國首位乒乓大滿貫得主——劉國梁。

劉國梁係現任中國乒乓球協會主席，有返咁上下年紀嘅史友應該都知道，劉國梁喺6歲就開始學打乒乓波，以10歲之齡去到北京比賽，好快就以高超嘅技術聞名。佢早喺1991年就破格入選國家隊，先係喺1994年同隊友一齊拎到世界杯男團冠軍，其後1996年亞特蘭大奧運、1996年世界杯、1999年世錦賽都憑住「直拍橫打」技術，拎到單打冠軍。佢仲喺1997年第44屆世界乒乓球比賽當中拎到男子團體、混合雙打、男子雙打三個冠軍，總之當時劉國梁呢個名真係足嚇親啲對手。

劉國梁唔單止獲獎多，佢仲要係打破外國壟斷局面，成為中國第一位乒乓大滿貫得主，果幾年整個世界乒壇仲被稱為「劉國梁時代」。而因為劉國梁呢個傳奇人物出現，甚至仲令到國際乒聯通過改革方案，乒乓球由38毫米改成40毫米、「無遮擋發球」嘅政策亦都推行。劉國梁後來以26歲之齡決定結束球員生涯，轉做中國隊最年輕嘅國家乒乓球男隊主教練！

原圖嚟自網絡