响今屆响日本東京舉行嘅奧運會乒乓球賽事當中,都會見到有部分國家嘅選手係華人,好似波蘭、德國、法國甚至盧森堡等,佢哋乒乓球隊都有選手本身係來自中國。中國球手轉國籍再响乒乓枱上對返中國球手呢種事其實都出現咗一段時間,而講到最經典例子就係九十年代嘅小山智麗。

小山智麗原名叫何智麗,同乒乓女王鄧亞萍係同期國家隊選手。嚟自上海嘅佢响八十年代初就贏得亞洲賽冠軍,响1987年就贏得第39屆世界乒乓球錦標賽女子單打冠軍。不過就响呢項賽事中佢因為無按指示「讓球」俾隊友管建華而懷疑遭到「懲處」,1988年未獲得奧運會比賽資格,亦從此未再在國家隊名單出現。

响1989年,佢下嫁日本人小山英之,之後就以小山智麗呢個身份重返乒壇,响1994年以日本選手身份參加廣島亞運會,仲擊敗咗喬紅、鄧亞萍等國家隊選手獲得亞運女子乒乓球單打冠軍。不過,小山智麗當年就曾因代表日本參賽而被部分中國球迷稱為「漢奸」。

原圖嚟自網絡