繼續同史友們介紹一啲傳奇嘅運動員,每逢提起奧運,大家好多時候都遺忘咗殘奧,而早前阿史就同大家介紹咗為香港拎過多面殘奧金牌嘅蘇樺偉,但香港出色嘅運動員又點止一個?仲有余翠怡啊!

余翠怡係香港輪椅劍擊運動員,以往就代表香港喺殘奧當中拎過7金3銀1銅,而呢一次東京嘅殘奧將會係佢第五次為港出戰。余翠怡嘅劍擊成績真係世界一流,之但係佢又係點解會接觸呢樣運動呢?原來係同一段不幸嘅經歷有關!

余翠怡喺11歲嘅時候就不幸患上骨癌,而喺接受化療期間就因為傷口發炎,令到左腳需要切除並且裝上義肢。喺手術過後,佢為咗可以盡快好返,就喺16歲嘅時候加入咗傷殘人士體育協會,最初就係以練習游水為主,但後來受到朋友鼓勵之下,佢就開始練習劍擊。

自此之後,余翠怡就踏上佢嘅劍擊之路,先係喺2001年第一次代表香港參加意大利世界賽即奪得兩面銀牌,後來又喺匈牙利世界盃賽贏得一金一銀;有咗呢啲戰績,余翠怡就繼續參加更多嘅比賽,甚至喺殘奧當中拎過7金3銀1銅。喺嚟緊開幕嘅東京殘疾人奧運會入面,阿史真係祝福余翠怡可以再次挑戰自己,拎到好成績啊!

原圖嚟自網絡