提起香港嘅運動代表隊，相信唔少史友心目中單車隊係排喺一個好前嘅位置，而香港嘅單車之所以會出到咁多世界冠軍，除咗因為運動員本身嘅天份同埋堅持之外，有一個好嘅教練都係重要嘅因素。阿史所講嘅呢位好教練，曾經亦都係被稱為中國最佳單車運動員嘅沈金康。

沈金康出生喺上海，早喺1973年就開始參加單車運動，冇幾耐就被選入上海單車隊，仲喺一年之後入埋國家隊。佢當時幾乎拎晒所有中國中長距離嘅公路賽冠車，所以佢就被稱為係70年代末期中國最佳單車運動員。之不過呢位運動員喺1980年果陣同隊友喺江蘇太倉進行150公里耐力訓練果陣，被一架大卡車迎面撞埋，沈金康畀卡車碾過左腿身受重傷，最後只可以截肢保命。

失去小腿嘅沈金康並冇放棄佢嘅單車生涯，反而係努力準備普通高等學校招生全國統一考試，最後考入上海體育學院，當時佢就已經係上海男子單車隊嘅主教練，其後仲喺1985年做埋中國國家男隊主教練，帶領住中國隊打破100公里團體計時賽亞洲紀錄。

而去到1994年，佢就受到國家體委委派到香港半年，協助香港單車代表隊喺廣島亞運會上爭取前六名，而由於當時香港隊嘅條件相當惡劣，既冇裝備又冇經費，就連全職運動員都冇！當時單車隊就搵到第一位運動員，呢個人就係洪金寶，兩師徒其後就喺冇政府資助嘅情況下，一邊返工一邊訓練，沈金康甚至仲將自己部份人工分畀洪金寶。結果喺四年之後，黃金寶不負所託贏得1998年曼谷亞運會200公里個人公路賽金牌，成為一代「亞洲車王」，最終贏得世界冠軍。

沈金康一直帶領香港隊至今，期間為港隊培育出蔡其皓、郭灝霆、陳振興、張敬樂、張敬煒、李慧詩等國際賽單車手，真正作育英材！

原圖嚟自網絡