東京奧運會就正式收官,嚟自世界各地嘅選手都拎住佢哋憑血汗打拼返嚟嘅獎牌返到自己嘅國家。對於呢啲獎牌,凡係運動員都會珍而重之,而唔講唔知以前就有一位世界拳王參加過奧運,但佢竟然喺贏取到金牌之後冇耐將佢掟落河,到底當中有咩原因呢?阿史今次就同大家介紹下啦!

阿史所講嘅之唔係世界知名嘅拳擊手、拳王阿里囉!佢喺1960年就曾經參加過羅馬奧運拳擊項目,雖然阿里嘅成名地後來係喺職業賽場,但對於奧運嘅榮譽佢都冇缺席到。喺佢參加羅馬奧運果陣,其實佢只係得18歲,拳齡唔超過六年,但喺佢當年比賽嘅時候,佢就以近乎壓倒性嘅姿態先後打敗比利時選手比卡斯 (Yvon Becaus)、墨爾本奧運冠軍沙特科夫 (Gennadiy Shatkov)以及兩屆奧運銅牌得主波蘭名將派翠科斯基 (Zbigniew Pietrzykowski)等等,得到男子 81 公斤級金牌。

經歷咁艱辛嘅比賽,阿里本應對呢項金牌珍而重之,之不過據講佢喺返到美國嘅時候,當時美國嘅種族歧視仍係相當嚴重,本來以為得到金牌之後可以令到情況有改變嘅阿里當堂心灰意冷,佢因為黑人嘅身份而被餐廳拒絕入內用餐。據講佢一怒之下就將金牌掟落河,後來阿里就喺職業賽揚名,展開佢嘅光輝歲月,直到1996 年國際奧委會薩瑪蘭奇 (Juan Antonio Samaranch) 先至補頒一面特製奧運金牌畀阿里,等佢可以重溫金牌美夢。

原圖嚟自網絡