連續睇咗大半個月嘅奧運賽事，相信唔少史友都意猶未盡，仲想阿史講多啲奧運嘅傳奇運動員，咁就當然冇問題啦！今次阿史就同大家介紹一下奧運史上拎到金牌最多嘅一位傳奇人物啦！

阿史所講嘅呢位人物就係有「水神」之稱嘅菲比斯喇！菲比斯係美國嘅男子游泳運動員，同時亦都係唔少世界紀錄嘅保持者。出生喺美國馬里蘭州嘅菲比斯早喺10歲嘅時候就已經打破咗美國100公尺蝶式分齡游泳嘅紀錄，自細同媽媽、兩個姐姐生活嘅菲比斯原來係患有過度活躍症，好難專注做一件事，而當時為咗處理呢個問題，佢兩個本身係游泳健將嘅姐姐就提議菲比斯開始接觸游泳，最初仲係以背泳開始學習。冇幾耐，游水就已經成為菲比斯生活中不可缺少嘅一部分。

喺教練Bob Bowman魔鬼訓練之下，呢位身體結構同一般人唔同嘅選手好快就代表美國參加2000年悉尼奧運，雖然呢一次佢冇得到好多獎牌，但就已經令佢成為美國68年嚟最後生嘅游泳選手。而佢喺2004年雅典奧運就參加咗八個項目，成功喺六個項目入面拎到金牌，近乎無敵嘅表現令佢成為當年奧運金牌數最多嘅選手。而佢去到2008年嘅巔峰時期，甚至仲喺2008年北京奧會游泳項目破咗7項世界紀錄，拎咗足足8面金牌；如果整體咁計，佢就擁有28枚奧運獎牌，當中有23面屬於個人項目，創咗奧運會嘅歷史。

原圖嚟自網絡