今日係8月13日,係抗日史上「八一三事變」發生嘅日子,呢件事亦都成為抗日戰爭當中第一場大型會戰——淞滬會戰嘅導火線,阿史今次就為大家介紹一下。

喺「盧溝橋事變」發生之後,對蔣介石而言日軍正係不宣而戰,兩國嘅關係亦都正式升級為全面嘅戰爭。喺1937年8月9日,當時日軍海軍陸戰隊西部派遣隊中尉大山勇夫同埋一等兵齋藤要藏就強行直衝中國上海虹橋機場,結果當時駐守機場嘅中國士兵就將兩人擊斃,呢件事就係史稱「虹橋機場事件」。

喺事件發生之後,日軍就以呢件事作為藉口,日本駐上海總領事向上海市長提出要求中國謝罪並向事件當中嘅士兵判刑、並且要限制停戰協定地區內保安隊員人數、裝備及駐軍地點,更過份嘅係要求撤除上海所有防禦工事,設立監視以上實行嘅日支兵團委員會,變相就係將成個上海交畀日本。

面對咁無理嘅要求,當然就唔會有人接受。於是1937年8月13日,日本海軍上海特別陸戰隊司令官就派出軍艦16艘、陸戰隊登陸淞滬,發動全面進攻,而中國軍民奮勇抵抗,呢件事就係史稱「八一三事變」。

原圖嚟自網絡