里約奧運使出「洪荒之力」 傅園慧

今年東京奧運會曲終人散，國家隊女子游泳代表團响賽事中取得唔錯成績，好似飛魚張雨霏個人項目200米蝶泳奪金，女子4x200自由泳接力賽又拎到金牌。不過今年嘅代表團就無咗上屆里約奧運大出風頭嘅傅園慧。

傅園慧早响2012年就第一次參加奧運會，仲响女子100米背泳賽事殺入決賽。兩年後响仁川亞運100米背泳決賽中奪得金牌。而响2016年里約奧運，佢就响女子100米背泳決賽贏得銅牌。雖然佢唔係奧運金牌運動員，但响個屆奧運佢就一炮而紅，原因係佢响準決賽同決賽接受訪問時，展露誇張表情同率真語言，成為當時網絡嘅討論對象。咁佢當時講咗啲乜呢？其中一句就話自己「使出洪荒之力」，「洪荒之力」係前幾年內地嘅流行網絡用語，源自於小說《花千骨》，解作妖神之力。就係佢呢一句，令佢成為當時最紅嘅國家隊女運動員。

不過，响今屆國家隊奧運選拔賽中佢因犯規被取消成績，而此後又未參加落選賽，所以就失去咗參加東京奧運會資格。除咗佢，倫敦奧運兩金得主葉詩文、中國游泳女神劉湘因未達奧運A標成績而錯過今屆東京奧運。